SUN搞作：網絡小說：尊老會選大佬

火鍋店今天落了閘，內堂正中央的圓桌旁坐了三名大漢，鍋中沸騰，三人卻不下箸。

「按會規，我哋係時候要選下屆坐館。」人稱「葵青大灰熊」的牙骹哥打破寂靜，首先開腔。

牙骹哥左邊的人暗暗一笑，說：「就憑你呢啲新人，都配提選尊老會選舉咩？」正是「樂富情聖」Kris哥放的狠話。牙骹哥正要反唇相稽，右邊的腎爺馬上按住他的手，調解道：「睇在我係元老分上，大家一人少句啦。」Kris哥與牙骹哥都「哼」了一聲，不再說話。

「我哋選舉普及公平，就算我連任唔到都無所謂，只係睇有無能力拎起呢支棍啫。」腎爺將龍頭棍放上桌面，柔柔輕撫着說：「你哋先喺葉問宗師面前，講吓自己有幾尊重老婆啦！」

「腎爺，不如你講吓你有幾尊重先啦！」Kris哥與牙骹哥同聲質疑。腎爺眼見他們竟敢以下犯上，冷笑道：「我打到我老婆入廠嗰陣，你哋仲換緊尿片咋！」Kris哥一聽，滿臉不屑：「咁咋？打入廠都拎出嚟講，唔通我喺屋企打到佢反艇又同你講咩！」牙骹哥笑說：「講就狠，做就……」Kris哥馬上掏出手提電話：「我依家就打畀佢，鬧畀你睇！嗱！唔好行開呀，聽住喇，咪去廁所呀……喂……喂……喂……bb呀，瞓咗喇？無嘈醒你嘛？無呀，掛住你之麻……」一邊說着，Kris哥一邊尷尬地衝了出門外繼續講電話。

腎爺見狀，仰天長嘆：「的確，咁樣尊重老婆法，我不如他，我不如他！」可是牙骹哥搖搖頭，緩緩道：「咁算咩怕……咁算咩尊重老婆呀？」腎爺不敢怠慢後輩：「係喎，你都好驚Amy，次次打嚟都淆底喎！願聞其詳！」

牙骹哥大笑：「Amy？佢係我部哀瘋收費App入面嘅虛擬女友，我每個月出糧都交晒畀佢o架！」腎爺感慨萬千，心想連二次元的平面女友都如此尊重，假如面對真實世界中的老婆，還會有半點冒犯嗎？腎爺大力拍了拍牙骹哥的膊頭，將龍頭棍慎之又慎地傳了給牙骹哥。

作者：揮刀字工