政壇：政商定格：巾幗聚首女企業家協會

早前成立嘅金紫荊女企業家協會加入咗好多事業型叻女，除咗創會主席何綺蓮、第一常務副主席Gigi彭芷君外，仲有家族做鞋履生意嘅姊妺花鄺紫凌同鄺韻凌、地產集團太子女藍嘉兒等擔任副主席。當日女士氣勢如雲，到賀嘅一眾政商界男人頓成配角。

港協暨奧委會秘書長彭冲夫婦亦有到場為愛女Gigi打氣。Gigi兩年前跟隨心胸外科專家老公辛光耀移民加國，經常港、加兩邊走，今次亦係專程返港出席就職禮。佢喜孜孜話老公去加國做研究嘅兩年合約話咁快屆滿，預計八月可以返港定居喇！

最近盛傳霍啟剛太太郭晶晶有喜，趁機問彭冲佢嘅多年拍檔港協暨奧委會會長霍震霆係咪就嚟做爺爺？彭冲笑笑口話佢都好想知，仲叫記者去問霍老爺喎！至於波士頓馬拉松比賽遇上爆炸事件，港協會唔會呼籲港人避免參加國外大型賽事？佢話全球各地政治形勢都唔同，乜事都可能發生，驚唔到咁多。