政壇：搞搞政：橄欖藝術論被鬧爆

繼西九文化區管理局早前向外國收藏家收購逾一千五百件中國當代藝術品惹起爭議後，尋日立法會一個委員會上又掀起討論。

呢批花咗十五億元收購嘅藝術品中，包括內地維權藝術家艾未未嘅作品，有泛民議員發言時就話擔心西九策展人會面對來自各方嘅壓力，要求西九團隊確保藝術上獨立自主。但「橄欖」陳鑑林就突然充當「藝術品鑑賞員」大發偉論，話雖然藝術有表達自由，但「自由兩個字唔係突然喺天度爆出來，係經過人去揀選」，仲認為不雅、淫褻、有政治性同侮辱性嘅藝術品，都唔屬於藝術品，希望西九管理局要小心衡量。

橄欖呢番言論一出，議會內外都引起回響，西九Ｍ＋博物館行政總監李立還擊，話如果冇表達自由，好難做到成功嘅博物館，仲話唔會自我監控，如果有壓力，以佢為首嘅團隊都唔會願意留低。唔少網民亦對橄欖嘅言論議論紛紛，有人話佢不知藝術為何物，有人更話：「那大衞像都非藝術品了。」