政壇：陳振彬約同學馬場敍舊

日前喺馬場見到青年事務委員會主席陳振彬同幾位書友仔食飯敍舊。佢憶述小時就讀位於九龍城區嘅耀山學校，眨吓眼已係四十幾年前嘅事。佢笑言當年嘅校園生活過得好開心，畢業後仍對母校念念不忘，所以就去咗做舊生會會長，往後幾乎所有舊生聚會都係由佢策劃同統籌。佢話當中有幾位同學已經移咗民，但每隔一至兩年同學聚會，佢哋都會專程返港參與。

做得會長當然做足工夫，佢早兩日已努力刨馬經，為同學仔提供貼士，最終個個都有收穫。