SUN搞作：Sun官場現形記：呻窮為填氹

守財奴鬍鬚曾無嘢叻，最叻出口術，成日話「正苦」庫房乾塘，但事實就係次次都水浸。早兩日，佢又喺網誌上狂數七大因素會影響經濟，就連北韓局勢都關香港事。扯到咁遠，鬍鬚曾擺明唔想做長遠嘅財政規劃，卸得就卸，成班網民梗係睇唔過眼，鬧爆佢喇！

鬍鬚曾︰香港有「山雨欲來」之勢……

網　民︰都未到夏天，邊度會咁快打風？

鬍鬚曾︰我講嘅係有七大因素影響香港經濟！

網　民︰咩因素咁巴閉？

鬍鬚曾︰淨係北韓嘅動盪局勢，都唔得掂喇！

網　民︰咁都關香港事？

鬍鬚曾︰依家個勢要打仗，一打仗股票、樓市就會跌，一跌就經濟差，一差就好多人失業……

網　民︰你同肥仔恩都幾似！

鬍鬚曾︰邊度似呢？

網　民︰淨係識一味靠嚇囉！

鬍鬚曾︰其實我成日嚇人係有苦衷……

網　民︰咩苦衷大得過市民福祉？

鬍鬚曾︰我話庫房乾塘，都係想慳番啲錢。如果唔慳啲，曾雀屎工程樣樣超支，邊得嚟咁多錢填氹！