政壇：葛輝辭官後心廣體胖

踢爆政府喺上網學習支援計劃遴選程序中、有政治干預嘅前政府資訊科技總監葛輝，自從以私人理由提早離任之後，鮮有喺公開場合露面。早幾日見到佢一支公現身中環歷山大廈，經由行人天橋，再沿港鐵站通道走到IFC。見佢神態輕鬆自若，左手拎住一個裝滿食物嘅塑膠手抽袋，應該係剛剛去完超市買嘢。久未曝光嘅佢似乎日漸心廣體胖，喺西裝褸半掩下，脹卜卜嘅肚腩若隱若現，從後望佢嘅體形，更有向橫發展嘅趨勢。

行行吓，佢遇到一位外籍朋友，隨即停低互相問候，之後仲將友人畀佢嘅卡片收好，跟住就走去停車場駕車離開。