政壇：陳肇始獻唱善長猛捐款
早前仁愛堂董事局換屆，Connie陳鄭玉而喺黃達東手中接下主席火棒，仲將董事局成員擴大到四十位，淨係副主席都有一打咁多，認真墟冚。新班子一上任就急不及待籌款，就職晚宴變身慈善騷，食物及衞生局副局長Sophia陳肇始獻出第一次，拍住Connie連唱兩首歌，台下善長踴躍捐款，Sophia笑不攏嘴。
Sophia話今次係首次公開喺台上唱歌，佢小時候係合唱團成員，多數係成班人一齊唱，冇今次咁搶眼，但諗到係為慈善而唱，就冇乜所謂喇！佢喺合唱團係唱高音，當晚與音色低沉嘅Connie合唱，反而唔係聽得咁清楚佢把聲，睇吓下次邊個善團可以打動佢，邀得佢獨唱飲頭啖湯？
陳肇始（左二）開金口獻唱，仁愛堂主席陳鄭玉而（中）、兩位副主席史顏景蓮（右起）同吳明珍開心到飛起。左一為史太女兒史佩加。
東華前主席陳文綺慧（左）經休息後顯得容光煥發。右為羅台秦。