政壇：福建幫新區插旗擴版圖

政府有意重劃東區同灣仔區議會區界，隨時將以北角為核心嘅福建幫勢力一分為二。不過有福建幫中人同我哋講，福建幫喺香港嘅勢力早已衝出北角，遍布港九新界，劃界建議對佢哋影響不大，但原來呢個「擴展版圖」行動，並非佢哋有心部署嘅結果。

自力更生 唔等人幫

香港位處廣東省南部，廣東人自然最多，估計有超過五百萬，第二多就係福建人，估計約有一百十一萬，即平均每七個港人，就有一個係福建同鄉，加上廣東幫內部又分作多個祖籍，例如潮州、中山、東莞等，有各自嘅方言同習俗，相對唔及香港福建幫咁團結，令後者喺社會同政壇嘅影響力有時更勝廣東幫，成為各方參選人士嘅兵家必爭之地。

全港過百萬福建人當中，最多當然係住喺俗稱「小福建」嘅北角區，中西區亦有唔少，而當年「蔡菜子」蔡素玉都係得到唔少同鄉撐，喺港島當選立法會議員，但原來好多遠至新界嘅新社區，依家都有好多福建人，例如將軍澳同屯門等，因呢啲地區有好多新建公屋，唔少新來港或受舊區重建影響嘅福建人，陸陸續續都搬咗去嗰度住，變相幫福建幫擴展版圖。咦！福建幫咪多咗好多地方插旗參選囉！蔡菜子又有冇考慮空降其他選區？

福建幫中人又話好多福建人住公屋區，故新一屆政府大力提倡扶貧，福建社團聯會亦有效法，但一度因改錯名而碰壁，因為福建人向來着重自力更生，寧願辛苦啲打幾份工幫補家計，都唔肯認窮伸手等人幫，對聯會嘅扶貧大計反應冷淡。