清潔運動當做騷 疫潮再來必糟糕

大家近排應該經常睇到一輯防範禽流感廣告,講一班小學生同老師玩看圖講故事,起居勤洗手,唔好掂禽鳥,更加唔好掂佢哋嘅便便,然後帶住陽光一樣嘅笑容離開課室。其實廣告仲有下集,就係班學生放學返到屋企途中,原來都係同垃圾崗為鄰,呢度有細菌,嗰度有病毒,結果雖然跟足老師指示,一樣人人中晒招。

好誇張?唔誇張,下集嘅恐怖情節其實日日喺你我身邊上演。唔信嘅話,睇下本報日前嘅報道吖,全港包括旺角、北角、深水埗等多個衞生黑點污糟邋遢,後巷同街市遍地垃圾又污水長流,簷篷同平台堆滿廢物陣陣惡臭,最大鑊係隨處棄置嘅食物殘渣,引來野雀爭食,搞到鳥糞處處。你話嘞,咁嘅環境點可能有效防疫吖?附近嘅街坊街里係咪隨時中招吖?

最令人火滾嘅係,呢啲衞生黑點已經存在咗至少十年o架嘞!○三年沙士肆虐,港府大鑼大鼓發起「全城清潔大行動」,列出全港衞生黑點洗太平地,點知十年後一一打回原形,污糟後巷繼續藏污納垢,邋遢橫街繼續蛇鼠一窩。咁樣叫做抗疫?咪當市民係小學生啦,唔該!

所以咯喎,「東方報業民意調查」顯示,近四成受訪者批評全城清潔大行動全無規劃;兩成七直斥官員做騷心態;兩成二不滿疫症一過,清潔行動就無影無蹤。對於衞生黑點故態復萌,四成一人直指清潔行動無成效;兩成五擔心黑點成為病毒溫床;兩成四形容打擊衞生黑點爛尾收場。

唉,港府抗疫當做騷,搞更多宣傳片都冇用啦。就睇過去三年吖,當局接獲垃圾堆積嘅投訴每年超過四千七百宗。咁即係話,全港大街小巷嘅垃圾同政府總部入面嘅官場廢物有得揮,港府有無扚起心肝清理垃圾,一目了然啦,吓話?平時唔燒香,臨急抱佛腳,港產官僚次次疫臨城下至嚟做大龍鳳,遲早又害到香港雞毛鴨血咋。對於港府計劃再次進行全港清潔行動,三成受訪者質疑成效短暫,淪為另一場清潔騷;三成斥當局後知後覺;兩成三指無助消滅衞生黑點。

清潔運動當做騷,疫潮再來必糟糕。清潔運動係需要嘅,不過要實實際際,唔好做騷心態,官老爺愚弄市民實無好結果o架。沙士清潔大隊長曾蔭權爵士就係人辦啦,潔淨香港無心無力,反而搞到官場烏煙瘴氣,結果自己淪為過街老鼠。今屆政府如果步佢後塵,令香港再次淪為疫埠,市民一定將你哋當老鼠咁對付,叮!

第一手消息請下載on.cc東方互動iPhone/iPad/Android/Windows Phone Apps