SUN世代：太陽能鬥士

人人都知太陽周身是寶，利用其熱力讓自己發光發亮，王龍毅是其中一人。在美國工作時，其公司大裁員炒剩一成員工，「生還者」王龍毅學懂要繼續留美，鬥心要比其他人燒得更紅。憑着這個信念，事業漸漸如日方中，還剩一年成為美國公民時，卻見到將太陽能轉換成電能是未來發展趨勢，於是放棄一切，由美返港，經營太陽能板生意，為世界環保出一分力。

二○○三年，王龍毅第一次接觸太陽能板發電概念︰「有個舊同學問我有無興趣過檔，佢間公司喺美國只係成立咗幾年，但發展得好快，了解之後，原來佢係做太陽能板生意。」

當時太陽能在美國市場起步不久，所有生產工序，都在美國進行，成本昂貴︰「如果喺內地設廠，生產成本至少可以減半，點解唔咁做呢？」王龍毅的疑問，令他的舊同學銳意將生產工序搬到內地，但王龍毅最終沒有過檔。

在美國讀商科出身的他，畢業後一直留美工作，做過幾間電子供應商公司，而頭幾年真的「難捱」。例如畢業翌年，豈料遇上科網股爆破，美國經濟大挫，他拿着工作護照打工，每天返工都擔心被炒︰「人哋幫你申請工作護照已經係bonus，自然對你有多啲期望，呢個世界係無免費午餐。」

「雖然公司蝕咗錢，但貨品質素係留住客人嘅重要因素。」

雨過就會天青，最終一萬名員工，炒剩一千人。那時他深明如要繼續留美，就要比其他人更努力工作，他不但無被炒魷，更獲賞識升職。

不少留美發展的港人，都希望申請綠卡，但正當王龍毅在美工作踏入第七年之際，他竟辭工返港，放棄只差一年的綠卡申請資格︰「一路都有留意住太陽能板嘅發展，○六年覺得有得做，所以決定返香港。好多人都唔明點解我唔等多一年，但嗰時係一個好機會，錯過咗就未必再有。」

事實印證眼光。返港後，他在父親原本的公司開拓太陽能板生意，生意額增加近一半。○九年，他在內地設立自己廠房，生產配件，再出口到歐、美等地。

由打工仔躍變成為老闆，經驗尚淺的他亦曾經觸礁︰「有次買咗批材料返嚟，先發現當中有種化學元素值低咗，令防銹嘅半導體物料黐唔到上去，要重新入過批貨。」幸好他終順利準時交貨，「喺呢件事上，雖然公司蝕咗錢，但貨品質素係留住客人嘅重要因素。」

由於本港地方有限，未能發展大型的太陽能發電站，因此王龍毅主要將生產配件出口到歐、美等地。在未來日子，他更有意與美國公司接洽，發展風能，以及代理樹根發電等生意，希望將再生能源的環保概念延續下去。

王龍毅 Profile

現職：新海洋國際有限公司業務拓展總監

學歷：美國俄勒岡大學商科與行政管理及金融學士、美國加州州立大學海沃德分校工商管理碩士