SUN搞作:打橫嚟講:廢柴庸官,點守衞香港?

香港人真慘,在危難關頭,得不到「祖國」的關懷之餘,更被一班受公帑支薪的廢柴拖累。

上星期,當大陸公布有一名小孩,確認感染H7N9禽流感,而沒發出任何病徵後,本欄率先質問香港政府如何防範內地五一假期洶湧來港的隱藏病毒大陸客(因香港官員從沒提及此問題),好嘞!兩日後,赫見那廢中之廢的商務及經濟發展局局長卡片蘇,喜孜孜的帶記者到一間靚酒店做show,又人肉錄音機上身的不斷重播又重播,猛說香港的酒店會做好預防措施,又說,若職員發現有疑似患上H7N9的旅客,便要求客人留在房內,並叫醫生上房檢查。

你哋話吖?世間仲邊度有啲咁低能嘅政府官員o架?除第三世界之下的「強國」外。

酒店職員又唔係醫務人員,若見有人打乞嚏、流鼻水或咳兩聲,請問要不要call醫生呢?即使真係有醫生到診,咁又點呢?都唔係解決這問題的核心源頭。我哋需要的,係「預防」,係阻止病毒由大陸疫區,透過「帶菌者」傳來「無疫症」的香港呀!廢柴!

蘇局長的做法,只是話畀大陸人知,香港的「服務」態度做得好好,叫大陸人安心多啲嚟「自由行」咋!

嗱!有關防疫,本應由食衞局的高永文出面至係o架!依家,來了一件「商務」的廢柴見傳媒,宣傳香港「好安全」,就係先從經濟利益為首的想法。立法會旅遊界議員姚思榮跟進說:「內地客對香港防疫措施有信心,不會影響來港意欲。」嗱!露了餡囉!

香港多廢柴,邊會有好日子過?

彭志銘

次文化考古學家,對城中潮語有深入研究,博徵博引,廢官廢人行埋一邊。

歡迎add我facebook一齊(目及)實政府

第一手消息請下載on.cc東方互動iPhone/iPad/Android/Windows Phone Apps