政壇：政商定格：議員廚藝賽鬥雞手鴨腳

扶康會尋日邀請咗九位立法會議員同智障人士合作煮餸，個個議員都雞手鴨腳。當中「地獄廚神」首推白鴿黨黃碧雲，佢竟然用茄汁炒蘋果同牛肉，最尾仲要加埋胡椒粉，酸、甜、鹹、辣乜味都有，食落口嘅人真係有苦自己知。

帶埋囡囡同太太嚟打氣嘅鄧家彪，唔知係咪太緊張，竟然煮到過晒龍，又猛落茄汁，最尾畀評判話佢碟餸似足雜果賓治；立會主席曾鈺成開頭係威係勢，識得用油爆香洋葱，撈起備用再炒牛肉，點知畀評判話佢炒得過老，只啱老人家食。馮檢基就大頭蝦到唔記得落鹽。比賽最後由陳恒鑌勝出，佢話冇諗過會贏喎！負責試食畀分嘅周中師傅話，其實位位議員嘅質素差唔多，只係陳恒鑌碟餸擺得靚啲。