政壇:政商定格:馮國經徐立之老友鬼鬼

早前喺中環歷山大廈見到利豐集團主席馮國經,同香港大學校長徐立之兩個大忙人歎下午茶,一邊歎咖啡,一邊高談闊論。馮國經喺○二年落任港大校董會主席,徐立之啱啱喺同年做校長,兩個人前後腳喺港大任要職。

坐到咁上下,兩人見時候不早,就舉手示意侍應埋單。馮國經主動掏荷包畀錢,身旁嘅徐立之冇搶住埋單,反而用手托住個腮,靜靜咁等對方找數,好有默契。離座之前,佢哋依依不捨,好用力咁握住對方隻手道別。記得馮國經嘅辦公室就喺歷山大廈,所以徐校長先送對方搭(車笠)上樓,然後一支公離開。記者上前同徐校長打招呼,問佢哋頭先喺度傾緊啲乜嘢大計?佢就話冇乜特別話題,天南地北乜都講一餐喎。佢仲話同馮國經係老朋友,一向都有定期見面,見大家都鍾意飲咖啡,咪約喺餐廳見面囉!

第一手消息請下載on.cc東方互動iPhone/iPad/Android/Windows Phone Apps

馮國經(左)同徐立之歎咖啡敍舊,言談甚歡。