政壇:搞搞政:梁繼昌組隊游渡海泳

議事廳內有部分議員係「波牛」,亦有個別議員係「飛魚」,據聞本身係游泳健將嘅會計界議員Kenneth梁繼昌,有意搵立法會同僚組隊參加一年一度嘅維港渡海泳,如果成事,一定可以提高立會議員處於低位嘅民望。

維園渡海泳自前年復辦以來,深受市民歡迎,其中去年參賽人數更突破一千六百人。曾喺中學時代做過游泳校隊成員嘅Kenneth,據聞有意發起搞立會游泳隊,然後組隊一齊參加渡海泳,已接觸過紡織界嘅Felix鍾國斌呢個運動健將,事關佢每周都會游水兩至三次,就算有風有雨都會改喺室內泳池游水。Felix證實Kenneth有同佢傾過吓呢件事,但佢強調依家係「十畫只有兩撇」。

除咗佢哋之外,聽聞金融界「星爺」吳亮星都係「游得之人」,有時間就會到馬會游水鍛煉身體。究竟係咪可以組成三個「撲水的中年」參賽?咁就要睇下佢哋牙力夠唔夠,勸掂星爺喇!

第一手消息請下載on.cc東方互動iPhone/iPad/Android/Windows Phone Apps

設計圖片及對白