政壇：曾鈺成為剪布鋪定路

上周三立法會恢復二讀辯論預算案時意外流會，本周三會議會先畀未發言嘅議員表達對預算案嘅意見，再喺官員回應後正式踏入審議修正案階段。社民連同人民力量四位議員早前提出七百五十項修正案，企圖逼政府就範推行全民退保。立法會主席曾鈺成尋日完成裁決，初步批准合共七百幾項修正案，而秘書處經詳細考慮後，決定將所有修正案合併成二百多項辯論，今日會公布裁決理據。佢話現時難以估計需要幾多時間審理有關修訂，但強調自己有責任保證議會順利履行憲制責任，更加首次表明唔排除會喺適當時候終止辯論，已強烈暗示一定會剪布。

佢又引述政府意見，話如果立會五月中仍未通過正式撥款，政府運作會大受影響，所以佢唔可以容許辯論無休止拖延。佢之後仲加重語氣，話如果辯論咗一段時間，又冇結束嘅迹象，佢會毫不保留採取剪布措施。