政壇：張建宗為拉關係話當年

立法會勞工界議員郭偉強嘅地區辦事處尋日開張，勞工及福利局局長張建宗都畀面撐場，佢喺致詞時話同郭偉強識咗唔算太耐，可能要拉吓關係，佢將自己曾經做過東區民政主任嘅陳年舊事都講埋，話自己當年經常喺鰂魚涌、筲箕灣一帶活動喎！

郭偉強話一直想喺地面開辦事處，但鑑於位置便利兼價錢相宜嘅心水地舖確實難搵，佢於是轉向高空發展，經過兩個幾月嘅努力，終於喺筲箕灣一幢大廈嘅九樓搵到舖位，七百幾呎每月租金盛惠萬四蚊。九樓咁高，啲街坊會唔會唔識摸上門而搞到議辦「拍烏蠅」o架？佢慨嘆其實都有諗過類似問題，惟有叫職員多啲落街宣傳招攬生意。