政壇:紅姑黑英齊撐綠色生活

天文台前台長「黑英」林超英向來奉行綠色生活,尋日佢出席香港地球之友喺馬鞍山郊野公園舉行嘅「綠野先鋒」植樹遠足挑戰賽,萬人迷紅姑鍾楚紅都以素顏撐場。黑英唔算靚仔,但勝在博學多才,難怪佢致詞時,紅姑都報以情深款款眼神。

紅姑崇尚低碳生活,仲係慳妹一名。佢話每當睇完電視或玩完電腦,都會熄機,唔會將佢哋設於待機狀態,話咁做慳番唔少電喎。佢又關注路邊空氣污染嚴重,慨嘆汽車排放太多污染物,搞到個天成日灰濛濛,走喺街上又焗又辛苦,希望大家幫手植樹,齊齊改善空氣質素。

黑英都感同身受,話植樹有助改善氣候暖化,但種完樹後,要確保樹苗能健康成長,咁先可以吸收二氧化碳釋出嘅氧氣,達致調節氣候之效,所以佢鼓勵植樹者定期上山,(目及)吓自己所種嘅樹喎!

第一手消息請下載on.cc東方互動iPhone/iPad/Android/Windows Phone Apps

林超英(左)講嘢風趣生鬼,鍾楚紅都忍唔住望多兩眼,十足小粉絲。(受訪者提供圖片)