政壇：鬍鬚曾靠嚇做守財奴

財爺鬍鬚曾年年估錯政府盈餘，明明係庫房水浸都畀佢講成乾塘，出口術基本上成為佢嘅例牌動作，佢尋日再度喺網誌靠嚇，狂數七大因素影響香港經濟，連北韓局勢都關香港事，仲話喺呢個「山雨欲來」嘅情況下，如果冇穩健財政儲備同經濟實力，好容易受外圍經濟影響。講穿咗，原來佢都係為繼續做守財奴而鋪路。

波士頓爆炸 不忘抽水

佢喺網誌列出嘅七大因素，基本上將成個地球近排發生嘅事串連埋一齊。包括兩大國際評級機構下調中國嘅信用評級；歐洲塞浦路斯上月爆發銀行危機、意大利國會經兩輪投票仍然未能選出新總統；朝鮮半島緊張氣氛持續；國際貨幣基金組織（IMF）調低全球經濟增長預測。

為增加可信度，佢仲講埋全球市況，例如現時多個國家都有量化寬鬆等「印銀紙」做法，但偏偏油價、金價等商品價格不升反跌，反映環球市場對經濟前景有保留，憂慮經濟衰退，又拉埋內地H7N9禽流感疫情有擴散迹象，本港市場氣氛亦會受牽連，分分鐘好似當年沙士咁就大件事。

夠喇夠喇，佢講到香港就嚟核爆咁，究竟政府應該點防備至好呢？點知佢講嚟講去都係嗰幾句，話政府要穩住內部格局，要擁有穩健嘅財政儲備同經濟實力喎。哦，原來講咁多嘢，都只係為自己估錯數而搵藉口，為政府擁有大額盈餘而罔顧小市民作擋箭牌。佢咁多年用「狼來了」靠嚇呢招唔厭嘅咩？但係市民就麻木晒嘞！

網誌埋尾，佢仲不忘抽水，話波士頓馬拉松嘅爆炸點，正正係佢同太太當年成日去嘅地方，令佢感受尤深喎。