SUN奇古怪：Sun潮語：【爽丫丫】

潮語「爽丫丫」意思好簡單，就係好爽咁解。「爽丫丫」好多時係用喺男女間嘅相處之間，例如係夏日炎炎，海灘充滿着住三點式比堅尼泳衣嘅年輕女士，呢個時候男士就真係「爽丫丫」啦。

港式粵語之所以難學，除咗係因為佢本身有九個聲調之外，呢種語言仲會不斷吸納一啲外來嘅語言或詞語，包括國語、英語、日語、台語、甚至係其他國家嘅方言、不斷自我更新。所以好多外國人、甚至係外省人學極都唔識。好多外來語包括係「放題」、「達人」、「素人」呢啲本來係日文漢字，今日都成為我哋日常語言嘅一部分。最近有個潮語「爽丫丫」，其實都頗為有趣。因為呢個潮語有幾種寫法，有啲寫成「爽歪歪」，有啲用英文字Y去寫，變成「爽YY」，到底呢個潮語係乜XY呢？

又或者講一位男士突然有艷遇，無端端可以同一位李嘉欣級數嘅女翻雲覆雨，講緊當然係二十年前嘅李嘉欣啦，咁就真係「爽丫丫」啦！「爽丫丫」通常用嚟形容官能上嘅爽居多。

咁到底係「爽丫」定「爽歪」呢？其實據估計，應該係「爽丫丫」至啱。毫無疑問「爽丫丫」係嚟自國語，因為國語人係好鍾意用呢個「爽」字去形容過癮嘅感覺。有人話係「爽丫丫」嚟自大陸，但其實本來呢個潮語係嚟自台灣至真。因為「爽丫丫」個「丫」其實係台灣獨有嘅注音符號，讀音係「呀」，「爽丫丫」即是表達「爽呀」呢種感覺，最初係喺網上出現。對其他唔識台灣注音符號嘅華語人士，一睇個「丫」字，誤以為係英文嘅「Y」，所以出現咗「爽歪歪」又或者「爽YY」呢個變種。不過潮語不嬲都無乜準則，只要多人用就得，所以無論「爽丫丫」又好「爽YY」都好，只要用得「爽」感覺「爽」，咁就「爽XYZ」都OK啦！