政壇：搞搞政：周一鑊「嶽曲」未完又亂噏

廢官周一嶽翻閹做平等機會委員會主席後，惹來外界好多批評，但外號「周一鑊」嘅佢卻好努力咁謀求進入新角色，更不惜亂噏嘢，彰顯自己支持平權嘅一面，又唔知衰咁獻歌喉，前晚佢出席公文袋嘅籌款晚會，又同「出櫃」歌手黃耀明合唱同志名曲《禁色》同《Amazing Grace》籌款，期間周一鑊唱到摸晒頭、瞇晒眼，鬼上身都冇佢咁好姿勢，可惜實際唔多掂。

佢早排一曲走晒音、甩晒嘴嘅《忘不了你》已震驚政界同嚇親唔少市民，今次搵咗個唱開歌嘅黃耀明襯吓，先減少咗驚嚇性。不過，唔知衰嘅佢尋日又再亂噏嘢，尋日接受電視台訪問時，任職政府時鮮有談論政改問題嘅佢竟然大變身，喺節目中高調評論二○一七年特首選舉辦法，話自己支持有提名同初選制度，希望初選機制有廣泛代表性、增加普及元素等，好似變身做政制及內地事務局局長同全國人大政協咁。正所謂「不在其位、不謀其政」，話晒都做咗幾年官，周一鑊卻一啲都領略唔到官場真諦，唔怪得畀人話佢廢！