政壇：梁智仁帶狗遊英使費大

香港大學校長徐立之同公開大學校長梁智仁尋日不約而同現身馬場，原來係獲邀出席賽馬會社群盃賽嘅嘉賓。無獨有偶，佢哋都係任期即將屆滿嘅大學校長，梁校長話，退休之後會做吓義工，仲需要多啲時間陪家人；至於徐校長就話依家要專心工作，暫無暇細想退休之後嘅去向。

梁校長離開馬場後就要搭飛機到英國，既探望喺倫敦生活嘅細仔，仲會會合較早前到埗嘅太太梁許安璞，同埋四歲愛犬Muffin，開始佢哋長達四星期嘅英倫之旅。梁校長透露，今次帶同狗隻出門遠行好麻煩，除咗檢疫工作外，航空公司亦要喺飛機貨艙搵位安置狗隻，至於票價就係按狗籠嘅尺寸計算，今次為愛犬買機票就花上幾萬元，比起乘客票價貴得多。