政壇：李慧琼獲配巡迴戰車

新一屆立法會新增五個超級區議會議席後，當選嘅議員亦得咗個超級議員之稱，不過各人都因為選區太大，有地區工作好似老鼠拉龜嘅煩惱。身兼行政會議成員嘅民建聯李慧琼（Starry）就快甩難，因為建仔買咗部價值四十萬元嘅客貨車畀佢用，內有流動辦公室，咁樣佢就可以坐住架車做十八區巡迴議員囉！不過呢一招好似抄借貸公司、甚至明星外景車嘅橋噃！

建仔主席譚耀宗（譚sir)話，其實其他議員都可以使用呢部車，只要向總部申請就得喇，但考慮到Starry身為超級議員，要睇晒全港十八區，尤其新界地區咁大嘅地方，周圍頻撲要用好多時間，加上現時喺屋邨難求議員辦事處位置，私人商舖嘅租金又貴，所以有架戰車可以方便會見市民。

譚sir仲透露，架貨Van經已落訂，之後改裝一吓，約個幾月後就會面世，始終係架用嚟做流動辦事處嘅戰車，車身外及車內嘅通風系統，都需要優化咁話。

黨內地位升呢

Starry話，希望有咗架戰車之後，佢同其他議員同事可以提供更好服務喇。我哋早前都講過，Starry係三料議員，應酬好多，以農曆新年期間計，佢每日平均出席四、五場活動，周末嘅話更係一日走八場團拜，真係跑到喘唔過氣o架。

不過，忙係有回報嘅，佢明顯被黨看重，日前該黨改選新一屆領導層，睇名單就可以揣摸一啲端倪，譚Sir連任主席，Starry、蔣麗芸及張國鈞都連任副主席，但Starry就係五位副主席之中排名第一，頂替咗因加入政府而變為普通黨員嘅劉江華位置，加上今次特別配備一架四十萬元嘅巡迴戰車，名副其實做巡迴超級議員喇！