SUN搞作：網絡小說：貪曾的贖罪券

話說貪曾趕時間去飲，咁就想學領導人，扮吓親民，咁就上咗架的士。司機大佬一眼見到貪曾，就想拒載，大叫：「你咪係雜種……當奴曾？即刻落車，同我即刻落車！」貪曾急中生蠢，即刻用佢極普通嘅普通話，扮同胞自由行：「呀，禾唔是當奴曾，你知啦，神州地大物博，人有相似啫！」司機大佬將信將疑，就車佢去到間酒樓。

貪曾數幾次有無找錯錢，先至落車。曾太已經喺門口等得不耐煩，輕責貪曾：「咁遲o架！啲鮑汁畀人lam晒喇！」貪曾微笑：「等我睇過……」然後就大力一索、一聞，就話：「放心，鮑魚仲未上呢！」貪曾挽住曾太正要入席，門口有西裝友截停佢哋：「麻煩出示入場券。」貪曾面色一沉，低聲問：「你真係唔知我係邊個？」

點知西裝友唔賣帳，竟然話：「天堂面前，一視同仁。麻煩嗰邊補飛，你要恩典、喜樂定平安，自己揀啦！」貪曾一睇價錢牌，恩典要成萬銀一位，正所謂天堂有路行唔到，吃不到的鮑魚是酸的，就嗚呼一聲：「有錢人要上天堂，比駱駝要穿過針眼仲要難！」西裝友見佢發難，即刻call人嚟，諗住拖佢出去。

「停手！」勢估唔到，人群中走出一個宗教領袖，大叫：「你睇唔到佢係前高官咩？我哋要順服有權柄嘅人！」呢位正正係擅長棟篤笑嘅宗教領袖。宗教領袖循循善誘西裝友：「經文教導我哋，要服從權威，尊重受膏為王嘅統治者，更加要和平理性非暴力非粗口！你哋咁樣對曾先生，落地獄o架！」

西裝友聽見「地獄」，不禁打咗個冷震，鬆開捉住貪曾嘅手。「對唔住，曾先生。」西裝友即刻頭耷耷道歉。「曾生，埋嚟呢邊先。」宗教領袖拉貪曾去一邊密斟：「曾生，睇在你幫手搞咁多祈禱日份上，畀個八折你啦！」貪曾一聽原來係賣黃牛，勃然大怒：「八千蚊？！我唔好去搭時光機返去買贖罪券？」

作者：教主