Sun奇古怪：Sun潮語：登6

早前家父生日擺咗兩圍生日酒，同枱多數都係啲同家父差唔多年紀嘅老一輩人士，即係嗰班4、50後。席間佢哋講到好多仔女問題，埋怨仔女一年都唔打個電話問候一下老人家，又話同啲下一代甚至下二代溝通唔到，連年輕一輩講緊乜都未知。如果佢哋能夠多啲學習潮語，或者裝番個WhatsApp，可能效果會好啲。不過，就算喺年輕一輩之間，因為智能手機同即時通訊軟件嘅普及，好多年輕人都喪失咗語言能力，只係識得用WhatsApp對話，真實對話能力開始退化，結果可能遲啲面對面相對無言，大家都係用手機打字交談。話雖如此，當晚生日飯局竟然喺呢班老人家身上，學到一個新潮語!咪以為潮語淨係後生仔專利，原來老人家之間都會有啲近年先至冒起嘅專屬潮語，呢個潮語就係 「登6」。

話說唔記得係二叔公定六姑姐講起，話有個 「登6」飯局要去。我即刻R晒頭，咩 「登6」呀?諾曼弟登陸定火星登陸?堅到要搞飯局?原來 「登6」?意思係指有人 「登上60」之齡，飯局係慶生飯局。

「登6」呢個潮語絕對係佢哋呢啲五十幾六十歲嘅人先會講，因為我哋距離個 「6」字實在太遠。我哋距離 「大6」可能近啲……最近， 「登6」或 「登六」呢個潮語都有喺電視上出現過。前排CCTVB為藝人曾志偉搞咗個慶祝佢60大壽嘅節目。當中一眾曾志偉嘅家人朋友，包括叻哥、成龍、麟伯一大班娛樂耆英，再加一班明星，群星拱照，個個飲到high high哋然後上台為志偉哥拜壽，賀佢 「登6」，然後响大氣電波逼市民一齊鼓掌。如果當時有位獨居長者，飢寒交迫，踎喺劏房，咁啱又係同志偉哥同日生日，睇住電視播出呢個金璧輝煌嘅畀面派對 「登6大典」，唔知佢又會有咩感想呢?定係更自慚形穢地咩都唔敢想呢?