政壇：政商定格：鍾楚義老婆投資購豪宅

香港豪宅用地買少見少，唔少發展商都惜貨如金。好似資本策略地產旗下首個跑馬地豪宅項目The Hampton賣到最後一個單位，都「肥水不流別人田」，由主席鍾楚義以老婆簡淑妍名義買入。唔知係咪鍾主席買畀太太嘅禮物？

話說回來，鍾太其實來頭亦唔小o架，佢係本港著名測量師簡福貽嘅女，以佢嘅財力，買豪宅亦綽綽有餘，只係鍾太平日作風低調，養尊處優，而佢細佬簡士民亦喺資本策略地產做執董。

講番今次呢單交易，鍾太買嘅係藍塘道The Hampton一樓A室及地下第四同第五號車位，面積有成二千七百呎，總共價值八千六百八十萬蚊。估計鍾太係買嚟做投資，雖然依家個樓市氣氛係差咗啲，但該豪宅位置唔錯，揸住等吓先，再善價而沽，亦未嘗不可！