政壇：政商定格：吳錦青升呢抱孫喜上喜

博愛醫院早前舉行新一屆董事局就職禮，由曾耀祥接潘德明棒做主席，而吳錦青就升呢做副主席。喺就職晚宴上，吳錦青成晚笑瞇瞇，原來佢大女Alyssa吳嘉瑩懷孕近五個月，預產期喺九月，首次抱孫做公公，自然開心到笑不攏嘴。準媽媽Alyssa原本諗住大張旗鼓打造億元會所，但被突如其來嘅喜事打亂部署，惟有將工作放埋一邊，專心迎接BB誕生。

講開最近嘅搶金潮，吳錦青平時都會買金當投資，仲話今次跌市只係借勢調整，睇好遲啲仍會上升，入少少貨都冇問題。分管華懋集團投資業務嘅前博愛主席兼華懋執董李家松就話，黃金冇息收，大企業揸住冇着數，始終都係股票好。