政壇：搞搞政：趙公梃辭任區會 鄭承隆等住頂上

早前都講過新民黨喺新界西四出招兵搵區議員樁腳，點知尋日政府就宣布該黨嘅荃灣委任區議員趙公梃辭職，認真耐人尋味。聽聞趙公梃辭職另有內情，該黨如意算盤係想趁機安插副主席鄭承隆頂替趙公梃嘅委任議席，但如果政府再委任同一個黨嘅人，好易引起區內其他政黨不滿。

有地區人士話，趙公梃辭職嘅消息喺區內流傳咗成個月，咁啱得咁蹺，鄭承隆近月又喺荃灣非常活躍，搵咗成隊人陪佢企街派傳單，街板亦經常見到佢嘜頭，用「蠢蠢欲動」形容佢非常貼切。鄭承隆係仁濟醫院前主席，加入新民黨前已好想從政，入黨後成為黨內大水喉，所以黨內人士都覺得佢野心唔細，唔會只想做區議員咁簡單，做委任議員可能只係佢部署嘅第一步，下一步分分鐘想染指立法會。

鄭承隆亦好老實話，自己服務咗荃灣區九年，對區內情況有一定了解，如果政府真係委任佢做區議員，當然樂意接受啦！咁怕唔怕被人批評該黨將委任議席「世襲」？佢話從來唔怕，因為區議員向來係有能者居之，政府自然會委任適當人選。估唔到佢連末代委任議席都食得唔好嘥，睇嚟好恨做議員喎！