政壇：曾裕辦社區廚房助弱勢

日前喺一個公開活動上見到「美容天后」Joyce曾裕，佢最近擔任一個食物回收慈善機構社區廚房小組召集人，仲報喜話已喺屯門搵到二千呎地方搞個大廚房，預計五月可以投入使用。到時由各大食肆轉贈嘅新鮮食材就可變成一碟碟美味餸菜，預計可為北區同屯門等區內弱勢社群提供愛心熱食喇！

除咗曾裕領導一個小組之外，有關慈善機構仲有四個小組，所屬召集人嘅來頭都唔細，包括有新世界發展聯席董事總經理鄭志剛、恒基地產副主席李家誠、信和置業太子爺黃永光同埋美心集團第三代掌舵人伍偉國，白手興家嘅Joyce躋身其中，確實係唔簡單。

其實，Joyce多年來默默為基層市民送暖，六年前佢創辦「身心美慈善基金」，已喺屯門成立兩間社區服務中心，提供食物同情緒方面嘅支援，可能因為佢嘅愛心同埋實戰經驗，所以獲邀做小組召集人都未定。