政壇：立會小學雞 齊打口水戰

預算案拉布戰未開始，尋日立法會內務委員會上一班議員就先為拉布而爆口水戰，皆因一講到拉布，大家最關心嘅都係使唔使通宵開會。

話說有份拉布嘅人民力量三子因去年七．一遊行後，涉佔據中環行車線被控非法集結，案件喺本月二十九日裁決，其中陳偉業就要求當日上午休會，畀佢哋出完庭再拉布。堅持拉布嘅社民連「長毛」梁國雄就幫口，話休會可以等議員順便休息吓，又形容議員通宵開會係自尋死路，仲懶好心話「唔想啲同事死」，兼且叫立會買定十個「心臟起搏器」，事關「有啲人真係有病o架！」

秘書處早有準備

建制派被人寸有病，當然群起反擊啦！工聯會王國興就話，立會應該按規矩辦事，唔可以遷就個別議員。向來聲大大嘅Ann蔣麗芸就反寸長毛「拉得布嚟又驚死」，「你唔得閒拉布就叫人休息，冇理由o架嘛！」仲叫拉布分子「垂危」時要出聲，咪搞到會議室出現大吉利是嘅事。但人民力量黃毓民回敬一句「關你叉事」，激到阿Ann冇聲出。唉！堂堂立會議員開會好似小學雞咁嗌交，認真羞家。

本身係泌尿科醫生嘅郭家麒就提醒長毛、阿Ann、鍾樹根同通過波仔嘅財爺鬍鬚曾，小心激動得滯爆血管，佢亦會帶定心臟起搏器等急救工具以防萬一喎。不過立會秘書處就話佢哋已有六部自動體外心臟去顫器，睇嚟佢可以慳番喇！財經事務及庫務局局長陳家強就話，就算真係通宵拉布，當局都冇後備方案，最多帶定睡袋去開會喎！