歷史建築遭荒廢 保育吹水唔抹嘴

顧名思義，保育保育，保護孕育。可惜港府嘅保育工作啱啱相反，係不保不育，任由歷史建築自生自滅！

嗱，審計報告炮轟當局保育不力，罪狀多多。就講政府擁有嘅二百六十幢古蹟及歷史建築物吖，至少十幢被長期丟空荒廢，包括薄扶林舊牛奶公司高級職員宿舍同調景嶺茅湖山觀測台，全部淪為無人照顧嘅古蹟孤兒仔，冷冷清清，失修殘舊，隨時仲破落過粵語殘片嘅鬼屋凶宅。

其他歷史建築物就算有政府認頭，命運都唔好得幾多嘅咋。其中六幢長期閒置，包括被評為二級歷史建築嘅黃竹坑新圍十號舊民居，當年政府花費三百五十萬元收購，話改作民俗博物館喎，點知後來計劃擱置，博物館變咗無人管，重門深鎖二十年，你話係咪離晒大譜吖。

古蹟唔止荒廢，有啲更加慘遭拆毀添。例如三級歷史建築物元朗橫洲福慶村三十八及三十九號，地政總署收到業主拆卸申請後，居然夠膽死落格，冇按照規定知會相關部門搶救，結果兩幢歷史建築眨吓眼就被夷為平地。

審計報告仲批評，當局對歷史建築物評級工作進度緩慢。唉，港府保育劣迹斑斑，罪狀仲長過歷史建築物清單，再數落去，隨時數到天光都數唔晒。一句講晒，港府保育嘅最大特色，就係不保不育，任由歷史建築物荒廢養蚊，自生自滅。

咁講啦，港產官僚開口埋口講保育，真係得個講字嘅咋，做起上嚟完全係另一回事。有辦大家睇o架，由政府擁有嘅歷史建築物都搞成咁，其他散落民間嘅就更加命運堪虞啦！港島景賢里、九龍塘李小龍故居、沙頭角葉定仕故居、大埔碗窰村、新田大夫第……近年慘遭摧毀嘅私人歷史建築多到數唔晒，唔係被人拆到甩皮甩骨，就係日久失修甩頭甩髻；唔係慘成漏水廢墟，就係淪為時鐘酒店。大家話嘞，港府講保育，係咪吹水唔抹嘴吖？

講開又講，港府保育政策仲有一個大敗筆，就係應保嘅唔保，唔應該保嘅反而保到足。嗱，何東花園極具歷史價值居然隨時被拆毀，舊政府總部西座不倫不類毫無保育價值反而被保留，你話係咪本末倒置、九唔搭八吖！

唉，歷史建築淪為孤兒仔，公有嘅荒廢，私有嘅損毀，咁樣搞保育，點能夠唔閉翳吖。要求港產官僚的起心肝洗心革面，唔係唔得，等到新政府總部變成古蹟嘅時候，或者有可能嘅，叮！