SUN搞作：打橫嚟講：新聞報道的原則要旨

香港的電視或電台新聞報道，每當有街訪截問途人意見時，一定一定會播出「正」和「反」兩種聲音，例如問：中學中文課程，加番「文言文」好唔好？就會有一個路人甲贊成，另一路人乙反對。初時，看此「傳播模式」，還以為係記者讀新聞系時，老師教的；後來，才知道，原來在九七後，電視和電台的新聞部主管頒令，要下屬採訪人員必做的指定動作。主管阿頭大條道理話：「報道須尋求正反雙方的意見」，為咗彰顯該機構的「公信力」，還自製《專業準則及道德守則》，每段新聞片必須有一正一反的講法，才能算合格，才可出街。

有記者朋友訴苦，指上述規定，乃反智白癡的蠢事，無邏輯的「自我保護」，和弱化香港思維的愚民手段，例如，報道前廉政專員湯顯明被審計署踢爆巧立名目，亂花公帑，帶頭貪飲貪食，同貪曾煲呔一樣衰格時，做街訪問反應，人人喊打，有一萬幾千人要求拉佢入冊，偏偏有一懵丙話「貪心乃人之常情」，或善心腸地話原諒佢，咁記者剪輯音影片段出街，便變成「一對一」，就符合咗主管主張的「客觀持平」？「多角度探討？」甚或「平衡兩方利益」？

做傳媒報道，只須根據事實，有利大眾社會，讓民眾享有知情權、監察政府、獨立無私……敢講真話便是！

有關湯顯明違背「廉潔精神」之大花筒一案，傳媒好應捉佢出嚟，親身當眾回應！佢匿埋咗喺邊呢？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府