政壇：政商定格：陳淑莊險叫法官做主席

本身係大律師嘅Tanya陳淑莊，雖然冇做立法會議員已有一段時間，但佢似乎依然好掛住議員身份。話說佢早前上庭打官司，望住法官發言時以為自己仲喺立會，差啲將「多謝法官大人」講成「多謝主席」。佢話好彩突然醒起當時唔係身處立會，講咗「主席」個「主」字後即刻改口講「法官大人」，否則一定畀人笑到面黃。

依家佢嘅工作仍安排得密密麻麻，今日佢會先喺黨周年籌款晚宴上表演棟篤笑，四月底再同媽咪去日本北海道旅行兼放假，六月中會舉行第二場個人棟篤笑，所以去完旅行後就要專心排舞同跑步練氣。佢講笑話細個跳過芭蕾舞、中國舞同社交舞，相信今次表演跳舞唔會難到佢喎！

上年佢將棟篤笑所有收益捐畀護苗基金，但今年就應藝人莫文蔚媽媽嘅建議，將啲錢捐畀勵智協進會，幫吓智障小朋友。