政壇：搞搞政：限奶令流會 議員齊卸膊

前日立法會恢復二讀辯論預算案，議員「慢必」陳志全趁大部分議員唔在場，喺休會前十五分鐘突要求點算開會法定人數，結果成功突襲，流會告終，導致「限奶令」嘅修訂未能表決。但幾乎所有議員都話流會唔關自己事，有建制派議員更歸咎主席曾鈺成唔肯即刻宣布休會翌日再續，真係卸膊兼姓「賴」。

慢必尋日亦澄清流會同自己絕無關係，又話只係盡責確保議事廳內有足夠人數，認為唔出席會議嘅議員應該為流會負全責。至於今次點人數令「限奶令」原封不動通過，慢必話要求點算人數時冇考慮過呢個因素，又話大家應該譴責嗰啲唔在場嘅議員，而唔係搵佢做替死鬼喎！

其實今次流會，好多建制派議員都係幫兇，好似商界林健鋒喺晚上七點左右就離開去食飯，仲有幾個議員去咗港區省級政協委員聯誼會就職晚宴；工業界梁君彥話病咗；而建仔主席嘅譚耀宗同航運交通界易志明喺晚上九點半左右鬆人。

立會未拉布先流會，建制派尋日就同曾鈺成開會商討對策。譚Sir話主席盡量將類似議案合併辯論，同埋動用主席權力不斷剪布，又話以防有議員再次突襲要求點算開會人數，已同泛民達成初步協議，分別派出最少二十五人同十一人輪流出席會議，確保在席人數多過三十五人。但富貴黨已表明唔會參與編更。