政壇：長毛周身債仲要選區會

因前觀塘坪石區議員陳百里加入政府而引發嘅補選下月二十六日舉行，自立法會議員「橄欖」陳鑑林囝囝陳俊傑喺本月十二日報名後，一直都冇人真正企出嚟挑戰呢個議席，直到尋日提名期最後一日，竟然殺出「長毛」梁國雄報名參選。區會選舉都要用好多錢喎，窮到燶嘅佢已因連場官司而要畀幾百萬元律師費，依家仲要參選？

長毛話本來白鴿黨員徐百弟出選，佢就唔參加，但白鴿黨講明收兵，佢又睇唔過眼建制派當正嗰區係屋企自出自入，所以佢咪代泛民主派出戰囉。點解由佢去參選？佢話佢哋內部商量過，任何人選都得，但佢知名度較高，而且今次要打橄欖嘅票倉，所以由打慣建制派嘅佢出戰最適合不過。

佢仲話啲官司仍有待上訴，但任何人都要對自己做嘅事負責，如果佢最後因欠債而要宣布破產嘅話，香港就要試吓冇咗佢嘅狀況喎！