政壇：林偉強馬國搵真銀

接連被「搣柴」後，新界鄉議局副主席林偉強多咗時間專心搞生意。尋日下晝見佢喺中環ifc寫字樓走廊行來行去，當時佢右手拎住公事包同疊紙，左手亦有一袋疑似戰利品，不時「左望望、右望望」，警覺性甚高。事隔約十分鐘後，有位女士向佢嘅方向趨前並接過文件，睇真啲原來係佢女兒、有「離島之花」美譽嘅Esther林穎妍，特首選舉期間就曾經流出一張Esther同候選人唐唐嘅合照。

林偉強之後透露，依家同友人夾份喺馬來西亞馬六甲投資房地產，因為相比泰國、菲律賓等國家，馬來西亞同新加坡等地治安較好喎，所以就投資玩吓囉！當問到佢係咪將馬六甲嘅投資項目文件畀女兒睇時，佢自爆係有關內地汽車生意嘅文件，之後佢逗留約十五分鐘後就離開。