上樑不正下樑歪 廉署食相實在差

一醜未平一醜又起，廉政公署又爆醜聞，再咁落去，仲點樣肅貪倡廉呀！

嗱，繼前廉政專員湯顯明被揭發周遊列國歎世界，同埋亂花公帑瘋狂送禮之後，廉署又被審計報告踢爆大花筒，酬酢開支嚴重超標，你話醜唔醜吖！

審計報告審查咗廉署社區關係處工作，發現問題多多。好似一一年底舉辦國際廉政工作坊咁，根據規定，晚餐開支上限係每人四百五十元，結果每人食咗五百二十三元，原因係去酒樓開餐都唔夠喉，仲要又買餐酒，又轉場食甜品，甜頭舔到盡，點會唔超支吖。

咁都未算離譜吖，幾日之後廉署人員又出動，不過唔係掃蕩罪惡，而係橫掃美食，一餐晚飯每人食咗一千零四十五元，超支一點三倍，問你服未。更離譜嘅係，廉署為咗掩人耳目，居然將超額開支全數計入活動宣傳費，被立法會議員炮轟做法匪夷所思，荒謬絕倫！

何止荒謬，簡直荒唐。廉署係宣傳香港廉潔，唔係宣傳香港美食，居然借宣傳名義花天酒地，仲唔係巧立名目大花筒？大花筒已經唔啱，仲要敗壞規矩亂咁開數，直情離晒大譜。所謂其身不正，何以正人，如果廉署連自己盤帳都一塌糊塗，仲點有資格講肅貪倡廉呀？如果廉署人員連自己都唔識避嫌，仲點教人廉潔奉公呀？

講到呢度，大家係咪有啲唏噓呢？廉署明明係反腐先鋒，點解淪落到咁嘅地步？答案就係上樑不正下樑歪，大家仲記唔記得，湯顯明被本報踢爆任內瘋狂外訪遊埠，耗費公帑近四百萬元，廉署人員有樣學樣，交際食飯梗係舔到盡啦。仲有吖，湯顯明五年任期花咗二十二萬公帑送禮畀各地政府官員，又係無王管嘅，手下不知檢點無規無矩，都係學佢嘅咋。

講多個事實畀大家知，廉署呢兩次「問題宴會」，最高領隊其實就係湯顯明。咁就唔怪得啦，上有所好，下必甚焉，有大花筒阿頭照住，做細嘅仲唔有恃無恐咩！

唉，廉署係香港廉政及法治嘅最後防線，可惜經歷貪曾七年之亂，呢條防線已經失守。煲呔曾爵士傍住富豪黐飲黐食，湯顯明周遊列國飲飲食食，而廉署人員就大花筒大飲大食，形成一條腐敗飲食鏈，香港廉政不經不覺被慢慢蠶食，遲早好似內地官場嘅咋。嗱，現任專員白韞六，如果你想省番靚廉署塊招牌，挽回香港形象，太一叮畀個貼士你，快啲依法辦事，請貪曾飲咖啡啦，叮！