SUN搞作：打橫嚟講：搶買金條 看香港無王管

亂世，一切常規盡失，再無秩序可言；邏輯混淆，是非顛倒，意想不到的「怪事」，分秒出現眼前，令所有自詡專家的高人，跌碎眼鏡。

繼美國高調「重返」亞洲，遣派重兵圍堵中國後，北韓瘋子發癲，更高調的喊打南韓同美國，又車啲大炮四圍「部署」，Set準目標，卻指向日本；而日本仔又「勾結」美帝和台灣（但又同台灣耍花槍爭尖閣諸島）；歐洲經濟頹敗，民不聊生，抗議行動多過「遊行之都」的香港；中東局勢更是千年難解地日漸狂躁。……全球咁「立亂」之際，照常理，人人揸金至係o架！但偏偏全球金價暴瀉，令早幾日之前仲叫人炒金嘅國際金融投資大鱷，畀人問候到O晒嘴。

當金價下跌不止時，正常邏輯思考的人皆停手觀望吧！但喺香港，偏偏有大批人湧入金舖搶購金條，呢班人多是大陸內地人，藉「個人遊」方便入境「掃貨」，佢哋話趁低好時機喎！即使一買就蝕水，都制。

中國人有走難DNA，揸金好過揸現金（尤其是人民幣）。說也奇怪，當黃金「買賣」是有管制出入口的時候，成班大陸人每人十條八條金咁「運」上大陸，點解無人制止嘅？又點解大陸人可以幾十萬幾十萬現金帶來香港？又無人追究的呢？中港融和得香港大陸化了？

講過香港無人執法，同買金的新聞時，原來，旺角地鐵站E出口的銀行中心商場內，本有一條路，可由奶路臣街直通到彌敦道的，現在，這「公共空間」都被一間金舖「佔為己用」，經裝修後「合併」為店舖的一部分，擴大了搵錢面積，又是無法無天，無執法的例證。

世界真亂，無王管、無規矩，已到不適合正常人生存的臨界點！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府