政壇：政商定格：唐唐歎咖啡巧遇霍震霆

全國政協常委唐英年（唐唐）一向都鍾意去中環咖啡店外賣咖啡，尋日佢去中環太子大廈一間咖啡店買咖啡時，竟然巧遇前立法會議員霍震霆，兩個鍾意咖啡嘅男人打招呼後，喺收銀處前傾咗幾句，之後唐唐才攞住杯凍飲離開。

穿西裝冇打領呔嘅唐唐，去買咖啡時手臂夾住一本雜誌，一派優游、寫意，買咖啡時仲聽咗個電話添，睇佢笑容可掬咁接聽，莫非係同樣鍾意歎中環啲咖啡嘅唐太郭妤淺打畀佢，叫佢買多一杯？

霍震霆得閒歎杯咖啡，佢嘅弟弟霍震宇就去ifc一間髮型屋剪髮，超級電腦迷嘅佢即使剪髮都腦不離身，呢間髮型屋嘅洗剪吹價錢係三百九十元，仲提供埋免費wifi，睇霍震宇離開時嘅樣似乎好滿意。