政壇：政商定格：中銀卡大班由妻管花紅

好多人都話太太係屋企嘅大掌櫃，中銀信用卡總經理蘇誠信（Dickson）尋日同傳媒朋友茶敍，被問到薪酬水平嗰陣，Dickson就生鬼咁答：「我哋集團嘅花紅你就要問和總（中銀香港總裁和廣北），至於我嘅花紅就要問我太太喇，因為佢已經將筆數入晒帳。」

原來佢返工管數都冇用，返到屋企都係老婆大人管。講完笑之後，佢又講吓港人嘅消費習慣，今年以嚟環球經濟充斥不明朗因素，但佢話，即使外圍經濟有幾波動都好，對香港人嘅消費習慣影響都有限，除非本港經濟出現大型負面因素，搞到失業率上升，唔係嘅話，對本地信用卡嘅影響都唔會好大喎。