政壇：搞搞政：田二少揼本瞄準新界西

政壇各黨都落力開拓地區勢力，新民黨更全力瞄準新界西呢個立法會選舉嘅大地盤，打滾商界多年嘅該黨副主席兼立法會議員田北辰（田二少），進攻政壇後，都好識用錢開路。據聞最近佢搞個復活節活動，就係聯同救世軍舉行「田叔叔糖果屋」活動，淨係派糖畀小朋友都使咗八萬元，另外又揼本幫新加盟嘅區議員聘請助理，加強地區服務。

派糖大出血外，據聞田二少仲關注埋新西嘅黨內人手，準備調派人幫助其他新界西區議員，有傳新民黨有區議員最高峰時有三個助理幫手，呢個理應係立法會議員助理嘅陣容，相信會羨慕死好多資源較為匱乏嘅政黨喇！咁揼本，可見新民黨爭霸新西地盤嘅宏圖。

佢哋仲搵咗元朗區議員黃卓健幫手物色有潛質嘅樁腳入黨，屯門區議員蘇嘉雯早前入咗黨，最近又搵埋王威信加入。王係律師，家族專幫發展商收購物業，喺元朗區內有「村屋大王」稱號，而且仲係鄉議局執委，更係元朗足球隊嘅總領隊，有番咁上下人脈，早年佢退出自由黨後一直保持獨立身份，後轉投新民黨。