政壇：李十．一放煙花曾德成聽意見

去年「十．一」南丫島海難造成三十九人死亡，有市民形容當日為「港殤」，當康文署早前發出新聞稿話搵機構贊助煙花活動時，有市民就促請港府停止「十．一」煙花，網上亦引起激烈討論。身在北京嘅民政事務局局長曾德成，尋日同傳媒總結北京之行時首度開腔回應，話會聽取各方意見，似乎口風鬆動咗少少。

被問及依家政府係咪搵緊「十．一」煙花贊助商，曾德成話去年「十．一」煙花活動發生南丫海難事件，港府同市民對海難引起傷亡事故都感到沉痛，佢完全理解呢方面嘅感受，但有關「十．一」活動一定會進行，活動方式會聽取各方意見。至於會否考慮暫停煙花匯演，曾德成再三強調正在聽取各方意見，又指政府前日有簡短聲明，其實亦係同一意思，再無其他補充。