政壇：李嘉誠基金助小老師培訓

中華總商會副會長莊學山幾兄弟一向愛心爆棚，由佢胞弟莊學熹（Charles）創辦嘅綿德社利公司，唔止喺新界西部自設廠房生產社企時裝，三年前仲發起成立幼吾幼慈善基金，集中精力關愛貧困家庭嘅小朋友。Charles話，基金嘅重點項目「333小老師培訓計劃」，推出三年來效果顯著，至今已有一千六百幾名小學生受益，佢嚟緊仲打算向關愛基金等申請撥款，希望擴大善款來源。

Charles平時較少公開露面，佢話除咗工作之外，仲會投放部分時間喺公益事業，佢特別關心小學生嘅教育問題，所以三年前出資七百萬元，並獲姐夫長實集團主席李嘉誠以李嘉誠基金會名義，捐助二千一百萬元支援「333小老師培訓計劃」，現時喺北區、觀塘、深水埗及天水圍設有四個培訓中心。同場嘅李嘉誠基金會項目代表馬勵志笑稱，佢細個都係成績麻麻嘅曳仔，所以目睹好多頑童參加計劃後變得懂事、守規矩，零舍開心。