政壇：鬍鬚曾出口術謀過關

立法會尋日開始辯論財政預算案撥款，社民連長毛同人力三子夾手夾腳再打拉布戰，事先張揚要提出七百五十一項修訂，由於預算案撥款涉及政府及公共機構運作開支，政府分分鐘癱瘓。建制派揚言會再次以日以繼夜、夜以繼日開會去應戰，財政司司長曾俊華（鬍鬚曾）尋日先出口術警告民生會受影響，但聽聞政府高層暗中已度緊好橋，除咗議會程序之外，唔排除另使橫手，誓要一舉剪布，避免公共財政出現危機。

家吓已經四月中，五月底前傾唔晒七百幾個修訂，就冇辦法通過撥款，到時各大政府部門冇錢運作，公務員冇糧出，真係可大可小o架。鬍鬚曾尋日擺明態度，希望啲議員小心行動影響民生；政務司司長林鄭月娥日前更直接嗌議員以大局為重。據了解，政府內部都嚴陣對待呢個可能嘅公共財政危機，磨利鉸剪，準備隨時剪布。

公文袋忽然轉軚

據知，政府度嘅橋中包括研究《基本法》嘅議會權力，亦有循議事規則法入手，其中最有效、最低成本嘅方法係從建制派挑選一兩位悍將，等佢哋主動向拉布議員「撩交嗌」，大家扯火觸犯議事規則時，立法會主席咪就此將拉布議員趕出議事廳，咁樣佢哋提唔到修訂，雖然建制派議員都可能因而「陪葬」，但撥款案通過就冇憂喇。

雖然泛民政黨白鴿同公文袋都縮沙唔敢拉布，仲向立法會議事規則委員會表明，願意研究修改議事規則限制「拉布」嘅意向，家吓有建議係研究吓參考外國做法，如得到三分之二或五分之四議員同意，可考慮「剪布」。公文袋死死氣解釋佢哋轉軚支持研究嘅原因係︰「與其立法會主席獨攬大權（處理「拉布」），不如等議員面對。」不過，呢頭話唔可以拉布至「地老天荒」嘅公文袋毛孟靜，轉個頭又話拉布「合情合法合理」，咁點解公文袋唔參加呢﹖係咪佢哋唔支持「合情合法合理」呢﹖議員把口一日噏唔停，但千祈唔好噏得就噏、左手打右手，否則只會令人懷疑佢哋人格分裂或黨格百變啫。