分拆教材得啖笑 家長繼續捱貴書

來來來,有嘢睇!教育局官員粉墨登場,為大家表演一場「分拆教材」魔術:嗱,話拆又唔拆,話唔拆又拆,咦,拆咗又係等於無拆喎!你話係咪好神奇呢?

不過最神奇嘅係,一場咁無聊嘅把戲,港府竟然不厭其煩玩足四年喎。早喺○九年,當局已經雄心壯志咁話,教師用書由學生間接埋單係唔合理嘅,為咗減輕家長負擔,書商有必要將教材同教科書分拆出售。結果經過幾年官商拉鋸,書商大獲全勝,港府被迫跪低,教材話就話拆咗,但學校仍可免費索取教材,綑綁式銷售一成不變。教育局官員變來變去,只係將自己變成一碌廢柴,碌返去政府大樓歎冷氣咯。

叮你個鎯鎯呀,都知港產官僚食塞米,弄巧反拙已經成為家常便飯,家陣教科書商得隴望蜀,摩拳擦掌向家長開刀,計劃將新學年中小學課本平均售價調高百分之三至五。最難堪嘅係,即使已分拆教材嘅課本亦只能維持凍價,個別甚至不減反加。有書商講到明,因為港府突然容許學校免費索取教師用書,令教材成本重新轉嫁到課本,最後導致分拆安排無助減低課本價格。而家長團體就批評,港府朝令夕改,對書商採取見步行步嘅對策,累及家長繼續捱貴書,促請當局盡快回應減書價嘅訴求。

太一叮無法理解港產官僚高深莫測嘅獨特思維,所以一直覺得分拆教材得啖笑。不過講到教科書售價昂貴兼年年加價咯喎,實在好想同大家探討兩個問題:第一,大家不妨問問親朋戚友,究竟幾多人會收藏當年用過嘅中小學課本呢?既然無,點解要用咁靚嘅紙同印刷呢?第二,大家又不妨攞幾本新版教科書來揭下睇下,係咪來來去去依然係當年嗰幾課呢?既然內容無變,點解又要年年改版咁勞民傷財呢?

一句講晒,欲加之價,何患無詞。在商言商,書商必然會挖空心思賺到盡,而望子成龍嘅家長必然淪為砧板上嘅魚肉。講到底,一切都係市場壟斷作怪。

針對呢個問題,有識之士多年前已經提出,應該採取由政府統一編輯、統一印刷同統一價格嘅「三統一」安排,既可以保障課本質素,又可以降低成本同售價,仲可以一勞永逸消除教科書加價嘅爭議同煩惱,一舉多得,何樂而不為?教育局官員一直耍手擰頭,好難唔令人懷疑官商勾結喎。

教育不是搖錢樹,好心港產官僚扚起心肝承擔責任,為莘莘學子做幾件實事。繼續喺教材分拆呢啲枝節問題上鑽牛角尖,盞嘥時間嘥精力嘥公帑嘅啫,叮!

第一手消息請下載on.cc東方互動iPhone/iPad/Android/Windows Phone Apps