政壇：政商定格：曾鈺成遊緬甸搭牛的士

早排復活節假期，立法會主席曾鈺成同太太去咗緬甸旅遊，緬甸封閉咗三十幾年，近年先開放，曾鈺成今次遊覽有乜特別閱歷呢？佢話最難忘一定係坐的士，唔係坐普通嘅的士，而係「牛的士」。

佢話由於緬甸太落後，但近年又突然湧入好多遊客，唔少鄉郊地方都出現咗一種牛的士，即係牛力車，為咗畀外國人知道呢啲牛力車可供乘搭，當地人喺牛力車車頂寫住「TAXI」，遊客一望就知。雖然牛的士速度慢啲，但城中人可以趁此機會試吓坐牛車嘅滋味，曾鈺成話呢啲牛的士一啲都唔貴，十幾分鐘路程都係港幣二十蚊左右，非常抵坐。