政壇：搞搞政：拉布戰花費考起陳維安

立法會拉布戰成為今屆文憑試嘅其中一個試題，仲拋出咗一個一千二百萬元嘅開支數目。立法會秘書長陳維安（Kenneth）做過教育局副局長，但佢話自己睇到呢條通識題都嚇咗一跳，因為畀題中引述嘅千二萬搞到矇查查，唔知筆數喺邊度嚟。連局中人都咁講，一般考生點算呀﹖

議會拉布戰虛耗時間又嘥電，不過就算有議員喺特別財務委員會問到上次拉布開支幾多，秘書處都不能提供準確答案，原因係立法會喺拉布期間無涉及真金白銀嘅額外開支，職員好多都係超時工作，所以無法計數。依家試題竟然有呢條數，佢哋細心查找一番，終於發現條數原來來自開會期間以「日以繼夜，夜以繼日」名句突圍嘅立法會議員王國興。秘書處翻查剪報，根據王國興嘅計法，計埋議員、職員人工，再加上會議廳燈油火蠟等，估計每日拉布開支達一百萬元，拉布十二日，計埋咪就千二萬囉。

立法會就撥款條例草案嘅另一場拉布戰即將展開，今次就有四百七十萬元嘅預算開支，因為預計要聘用臨時工應付。又係嘅，議員玩拉布，職員被迫開OT，聘臨時工都公道嘅。