政壇：鄉議局新大樓又出事

新界鄉議局位於沙田石門嘅新大樓，由籌建到落成用咗五年，建築費更由原先估計嘅幾千萬超支到近二億元，點知前年新大樓入伙以來，先後被牆身滲水、大劇院舞台地板及工程費債務問題困擾，最近又被發現原來大樓嘅電力裝置唔符合法例規定添！又要使錢執漏，之但係以上種種問題邊個負責呢？咁耐又好似都未有人提出要追究責任，認真和諧。

鄉議局新大樓管理委員主任委員劉業強（Kenneth）尋日喺鄉議局執委會中，申請撥款十萬元，作為電器改動費用及購置保安設備費用，因為早前有專業人員為大樓進行電力測試時，發現大樓內部分電力裝置唔符合法例規定，聽聞有可能係之前裝設電力裝置時出問題，所以局方要搵間工程公司搞掂佢，否則就攞唔到機電工程署嘅證書喎。Kenneth仲建議，新大樓建築工程專責委員會同大樓承建商開會時，要傾吓點解會出現問題，仲要檢查大樓內有冇其他配套設備有類似情況。

據了解，今次大樓除廚房電箱要改裝外，電線、電掣房嘅地線同插蘇等通通都要整，費用要成六萬元。至於保安設備方面，鄉議局為慳番中介公司嗰筆，決定自購設備，由鄉議局去聘請保安人員，所以前後加埋要用多十萬元，開支認真大。