政壇：名人子女波士頓報平安

美國波士頓馬拉松爆炸案震驚世界，城中唔少名人子女都身處波士頓，中華廠商聯合會會長施榮懷嘅大仔施湧樂就喺波士頓大學讀緊一年級，爆炸前半小時，湧樂都同幾位朋友去咗現場睇熱鬧，好彩睇一陣就返宿舍，避過爆炸。施榮懷話收到阿仔報平安嘅短訊後都嚇咗一跳，仲即時叮囑阿仔少去熱鬧地方，盡量留喺學校。

立法會議員單仲偕細仔都係喺波士頓讀書，而且仲係運動健將，好在細仔唔鍾意跑步，亦冇去觀賽，佢先至冇咁擔心。反而身處華盛頓嘅大仔就同單仲偕講，已經報名參加嚟緊嘅華盛頓馬拉松，冇諗過因為今次事件而退出比賽，搞到剛放下心頭大石嘅單仲偕又提心吊膽，要苦口婆心咁勸大仔唔好跑，但似乎大仔堅持要跑。

至於行政會議成員羅范椒芬個仔畢業後仍留喺波士頓工作，佢冇參加今次比賽亦冇去觀賽，但佢事發生後都即時以短訊向媽咪報平安，反而羅太當時仲瞓緊覺，完全唔知咩事，要到起身後先知阿仔安然無恙。