政壇：長毛變相打劫公帑

打官司動輒涉及驚人律師費及訟費，最近立法會就因長毛梁國雄嘅一宗陳年官司起爭拗，事緣立法會當年成立專責委員會調查梁展文事件，新世界鄭家純就提出司法覆核，挑戰立法會嘅權力及特權法。呢單官司立法會當時都有請律師「應戰」，不過長毛就偏偏要與眾不同，自行請有「李漢奸」之稱嘅民主黨李柱銘做佢代表律師，結果要孭一百二十萬元訟費，但佢轉頭卻要立法會幫佢找數，即係搵納稅人幫佢埋單！

長毛年中出入法庭嘅次數多籮籮，偏偏住緊公屋嘅佢又經常嗌窮，佢話李漢奸筆律師費已經畀咗，而且今次佢都係因為議員身份先惹上官非，冇理由要佢畀錢咁話。之但係，長毛打呢單官司前有冇問過納稅人意見o架？佢如果擅自畀生意李漢奸做，轉過頭要納稅人埋單，事件一旦成為先例，以後啲議員鍾意就打場官司，普羅大眾咪好弊？咁算唔算打劫公帑呢？

議員意見各異

睇番呢宗官司，新世界○九年同立法會「對撼」敗訴，新世界要支付立法會訟費，而自己請律師嘅長毛就獲法院頒令，其四成律師費亦由新世界負責，但餘下六成長毛就要自己搞掂。當年長毛已要求立法會代佢畀埋嗰六成，但立法會行政管理委員會委員就唔多贊成，事情拖延到換埋屆都未解決。尋日行管會又再開會討論長毛要求立法會找嘅呢筆數點處理。

有議員就覺得長毛都係履行公職，立法會都應該幫佢負擔，但亦有人表明立法會唔應該孭起呢筆錢，「個個自己請律師條數咪好大，咁做仲得掂嘅！」皆因拗咗幾次都冇結果，行管會決定召長毛開會。講到尾，件事都涉及長毛抽水抽出禍，依家要大家為咗佢而將啲公帑畀李漢奸，立法會內梗係爭議聲四起喇！