食物改造無標籤 官僚基因太失敗

人類食咗基因改造食物之後，人體基因會唔會被改造呢？呢條問題拗咗幾十年，拗到家陣都無結論。所以咯喎，基因改造食物一直具有爭議性，有人食完當補品，有人食咗騰騰震，買唔買全由消費者自行抉擇。

咁消費者點樣識別邊啲食物係基因改造呢？嗱，除非閣下係基因改造新人類，雙眼擁有X光透視功能，否則別無選擇，只能夠……睇標籤！可惜嘅係，香港嘅基因改造食物標籤制度原來係畸形產品，監管粗疏嚇到市民食不安心。

話說消委會同食安中心合作，抽查市面四十九款粟米食物，發現兩成半樣本含基因改造成分，其中五個樣本含成分超過百分之五，一個更加高達百分之六十四添，但係居然全部博大霧，無貼上「基因改造」標籤提醒買家。食安中心急急補鑊，向有關零售商或分銷商發出勸喻信，要求依照指引註明標籤。

有冇搞錯呀！明明係基因改造食物，居然無貼標籤註明，咁咪即係呃消費者！不良商人魚目混珠，官老爺只係發出勸喻信，咁同無牙老虎有乜分別？咁搞法，睇嚟被基因改造嘅應該唔止粟米食物喎，仲有食塞米嘅官僚，改造失敗搞到原本應該以民為本嘅官場基因消失殆盡，叮！

唔止港產官僚基因改造失敗，標籤制度一樣係基因改造失敗。嗱，同一條基因改造食物標籤制度，喺歐盟、內地、日本、南韓同台灣等地區要強制性遵守，但係香港就變咗自願性執行，咁咪即係挖個陷阱畀消費者踩囉！如果做生意嘅人人咁自律，消委會就唔會長做長有啦，戇居！

所以消委會就話嘞，雖然未有證據顯示基因改造物質對人體有害，但唔使用正確標籤就肯定係削弱消費者知情權，促請政府長遠落實強制性標籤制度，保障消費者權益。

明知有市民視基因改造食物為洪水猛獸，避之則吉啦，港產官僚居然仲製造漏洞畀不良商人魚目混珠，簡直靠害。最好笑嘅係，政府早前仲話，打算就基因改造食物推行強制性銷售前安全評估喎，咁即係佢哋一方面唔肯定基因改造食物百分百安全，一方面又懶理市民錯誤買入基因改造食物，咁仲唔係變態？

話時話，睇嚟必須貼上標籤以資識別嘅唔止係基因改造食物，仲有港產官僚，標籤紙註明「失敗成品」！